Joe Biden oo ku dhawaaqay inuu mamnuucayo saliida uu ka soo iibsado Ruushka

Mar 8 (Jowhar.com) – Madaxweynaha Mareykanka Joe Biden ayaa ku dhawaaqay in Mareykanka uu mamnuucayo saliidda Ruushka iyo tamarta kale ee laga keeno Ruushka, taasoo sare u qaadaysa ololaha cadaadiska ee Moscow oo ay kaga aargoosanayaan duulaanka Ukraine.

Madaxweyne Biden ayaa ku tilmaamay talaabadan inay tahay mid lagu xanuunjinayo Ruushka.

“Tallaabadan waxaa lagu bartilmaameedsaday halbowlaha ugu weyn ee dhaqaalaha Ruushka.”ayuu yiri Biden.

Biden ayaa warkan ku dhawaaqay wax yar ka dib markii guddiga Yurub uu sheegay in ay dhimi doonaan baahida Midowga Yurub ee gaaska Ruushka saddex meelood laba iyadoo Midowga Yurub uu 40% ka helo Ruushka gaaska wadamadaas laga isticmaalo.

Dhaqaalaha Ruushku waxa uu aad ugu tiirsan yahay tamarta. Waa dalka saddexaad ee ugu wax soo saarka badan saliidda adduunka, marka laga reebo Sucuudiga iyo Maraykanka.

Qiyaastii 8% saliidda Maraykanka iyo badeecadaha la sifeeyay waxay ka yimaadaan Ruushka, halka Ruushka uu ka yahay 6% saliidda UK la soo dhoofiyo.

Midowga Yurub wuxuu aad ugu tiirsan yahay tamarta Ruushka, wuxuuna sheegay inuu u beddelan doono sahay kale oo uu si degdeg ah u ballaariyo tamarta nadiifka ah , iyada oo ujeedadu tahay in Yurub laga dhigo mid ka madax bannaan shidaalka fosil ee Ruushka ka hor 2030”.

Talaabadan ayaa kusoo kordhinaysa liis dheer oo cunaqabatayn dhaqaale ah oo lagu soo rogay Ruushka kadib duulaankii Ukraine – Baanka dhexe ayaa la xayiray hantidiisa, qaar ka mid ah bangiyada Ruushka ayaa laga jaray shabakadaha lacag bixinta iyo Jarmalku hakiyay dhuumaha Nord Stream 2.